बुटवल । राष्ट्रिय गौरवको आयोजना नारायणगढ–बुटवल सडक खण्ड विस्तारले गति लिएको छ । विगतमा निर्माण सुस्ताइरहेको अवस्थामा भौतिक पूर्वाधार तथा यातायात मन्त्रीको ताकेताका कारण निर्माणले गति लिएको हो । कुल १ सय १३ किलोमिटर रहेको यो सडक २ खण्डमा विभाजन गरेर निर्माण भइरहेको छ । पूर्व–पश्चिम राजमार्ग अन्तर्गत पर्ने गैँडाकोट–दाइउन्नेलाई पहिलो र दाउन्ने–बुटवल  सडक खण्डलाई दोस्रो खण्डमा विभाजन गरेर निर्माण थालिएको थियो ।
नारायणगढ–बुटवल सडक योजना पूर्वी खण्ड अन्तर्गत गैँडाकोट दाउन्ने खण्डमा ५८ प्रतिशत भौतिक प्रगति रहेको छ । कुल ६५ किलोमिटर रहेको यो खण्डमा एकतर्फी ४५ किलोमिटर कालोपत्र भइसकेको छ ।
नेपालको पहिलो सडक भएका कारण निर्माणमा समस्या आएको सडक विभागको तर्क छ । एकै पटक १ सय १३ किलोमिटर सडकमा डाइभर्सन निर्माण गर्न समस्या भएका कारण निर्माणमा ढिलाइ भएको सडक विभाग अन्तर्गतको एसियाली विकास बैंकका आयोजना निर्देशक चुडाराज ढकाल बताउँछन् ।

‘तोकिएकै समयमा निर्माण सक्न आयोजनाले आफ्नो सयंन्त्रहरुलाई प्रभावकारी परिचालन गरिरहेको छ ।’ ढकालले भने– ‘यो खण्डमा १८ स्थानमा कालोपत्र गर्ने गरी काम भइरहेको छ । यहाँ तीन किलोमिटर पुल र कलभर्ट निर्माण हुनेछ भने आगामी बर्खा अघि गैँडाकोट दुम्कीवासम्म एकतर्फ कालोपत्र गर्ने तयारी छ ।’
निर्माण कम्पनीलाई समयमै निर्माण सक्ने गरी संयन्त्र परिचालन गरिएको नारायणघाट बुटवल सडक योजना पूर्वी खण्डका योजना प्रमुख अनुक्षा घिमिरे बताउँछिन् ।
४३  महिनामा निर्माण सक्ने लक्ष्य राखिएको भए पनि तत्कालीन समयमा साइट क्लियरेन्स, निर्माण सामाग्रीको अभाव र कोरोना महामारीका कारण लक्ष्य अनुसारको काम गर्न नसकेको निर्माण पक्षको दाबी छ ।
सडक विस्तारमा निर्माण पक्षले लागि ग्रेडर, लोडर, एक्साभेटरसहित १८ स्थानमा  पाँच सय ५० जना श्रमिकले परिचालन गरिएको छ । गैँडाकोटस्थित नारायणी पुल क्षेत्र, डन्डा, सिजी, अरुण खोला बजार क्षेत्रमा कालोपत्रका लागि धमाधम काम भइरहेको छ । दुम्कीबास आसपास करिब आठ किलोमिटर क्षेत्रमा पनि कालोपत्र गर्ने गरी काम भइरहेको परामर्शदाता कम्पनीका प्रतिनिधि उदय ठाकुर बताउँछन् ।
‘कम्पनीले लक्ष्य अनुसारको काम गर्न आफ्नो संयन्त्र परिचालनमा कुनै समस्या छैन ।’ ठाकुरले भने ।

चिनियाँ निर्माण कम्पनी चाइना स्टेट कर्पोरेसनले २०७५ माघ २२ गते सरकारसँग सडक निर्माणको सम्झौता भएको थियो । वर्तमान प्रधानमन्त्री केपी शर्मा ओली दोस्रो पटक सत्ताको नेतृत्व गरिरहँदा २०७५ चैत ८ मा सडकको शिलान्यास गरिएको थियो । त्यसयता सरकार फेरिरहे पनि यो सडक निर्माणले कुनै गति लिन सकेको थिएन ।